Силен бренд и посветеност на работата

Образовниот систем фокусиран на развој на когнитивните способности и интелектуалните потенцијали на децата „Малец Генијалец“ веќе седум години е присутен на пазарот на Северна Македонија. Војислав Пековиќ, носител на мастер франшизата за овој пазар, вели дека обемот на работењето и динамиката на развој на франшизната мрежа не биле исти на почетокот и сега. – Додека не се видат резултатите, ретко кој има доверба во нова франшиза, а кога ќе се дојде до резултати, тогаш сите мислат дека и тие можат. Но – нагласува Пековиќ – во франшизниот бизнис постојат прецизни чекори, кога и како нешто се прави, што на крај доведува до успех – вели тој.

Сега имаат многу повеќе барања за отворање на франшизни училишта. Пековиќ вели дека, сепак, не брзаат со проширувањето. – Купувањето и отворањето франшиза е само мал дел – од 10 до 15% од работата што го очекува идниот примател на франшизата. Сè друго е во правилно насочување и добра комуникација со оние што веќе го имаат изминато тој пат. Токму тука е нашата најголема сила – вели тој.

За сега, на пазарот на Северна Македонија функционираат 12 училишта „Малец Генијалец“ – пет се во Скопје, а по едно има во Куманово, Кичево, Кавадарци, Велес, Штип, Охрид и Битола.

Посветеноста на примателот на франшизата е клучна
Луѓето што се заинтересирани да отворат и водат училиште под франшизата „Малец Генијалец“ треба, според Пековиќ, пред сè да бидат посветени на работата. – Тоа е универзално правило. Ако не си посветен и истраен, сè е тешко. Секако, луѓе што веќе работеле претприемачки бизниси имаат предност, иако за овој вид работа добри би биле и луѓе што биле менаџери во големи системи, а сега сакаат да се испробаат во приватен бизнис – објаснува Пековиќ.

Најголемата придобивка од оваа франшиза Пековиќ ја гледа во тоа што идните приматели можат да сметаат на огромно искуство и поддршка од нивна страна. – Како што веќе спомнав, ние го поминавме целиот процес од самиот почеток и точно знаеме кои се предностите, а што може да биде пречка при започнување бизнис. Го прифаќаш она што дало одличен резултат и не го правиш она што се покажало како грешно. Многу едноставно – вели Пековиќ.

Покрај тоа, како придобивка ја наведува и специфичната обука на наставниците, како и самиот квалитет на образовните програми што ги нудат во училиштата. – Јапонскиот метод на работа дава неверојатни резултати кај децата, така што е еден од најдобрите. Многу нови франшизи допрва треба да се докажат и да постигнат одлични резултати, додека ние тоа одамна го имаме потврдено – преку работата на училиштата, преку големите натпревари и Олимпијади по ментална аритметика – истакнува нашиот соговорник.

„Секое место заслужува да има Малец Генијалец“
Во наредната година планираат да го удвојат бројот на франшизни училишта во Северна Македонија, а се надеваат дека во иднина секој град, па дури и помалите места, ќе имаат барем едно училиште од овој бренд.
– Во план се и иновации за кои сè уште не можам многу да зборувам. Исто така, работиме и на тоа во Скопје да организираме меѓународна олимпијада, која ќе ја покаже неверојатната моќ на знаењето кај децата, но и силата на брендот – вели Пековиќ.