Sвездата од Јадранот на американскиот пазар

Веста дека франшиза од Адриатик регионот која веќе освоила повеќе од 15 пазари низ светот, успеала да започне со работа во Соединетите Американски држави, има повеќекратно значење. Да се влезе на пазар каде франшизингот е поразвиен отколку каде и да е во светот е значаен потфат, за што сведочи и Андреја Чолак кој со својот деловен партнер Денис Полиќ го осмисли брендот и концептот за помфрит-барови Surf'n'Fries. Покрај тоа, како што вели, Америка има добро регулиран пазар заради што потребни се повеќегодишни подготовки  за да му се пристапи. Го прашавме што е потребно  да се подготви за тоа деловно патешествие, зошто е тешко да се најде инвеститор за странски бренд, во која фаза од развојот се сега и што ги очекува натаму пред да кажат дека успеале во Америка. 

Како се одвиваа подготовките за САД? Колку беше тешко да се пристапи на овој голем пазар во кој конкуренцијата е многу силна, како и самиот франшизинг?

Повеќе години размислуваме и се обидуваме да влеземе на пазарот во САД. Мора да признаеме дека за странски бренд, особено од овој дел на светот, предизвикувачки е да се направи првиот чекор. Пазарот на франшиза во САД  е неспоредливо поразвиен во однос на останатиот дел од светот, а е и многу добро регулиран. Кој и да сака да започне со франшиза на тој пазар, основно е поседувањето на FDD (Franchise Disclosure Document) – детален документ со податоци за работење за чија изработка треба да се инвестираат 40.000 до 100.000 долари. За наши услови тоа е многу голем капитал. Заради тоа многу брендови бараат инвеститори, но проблемите се случуваат во фазата на вреднување на брендот.  Имено, за брендовите од странство тешко е да се направи добро вреднување (валуација), бидејќи најчесто работаат на пазари со помала куповна моќ отколку што е американскиот. Натаму, американските инвеститори тешко го прифаќаат предизвикот на носење на странски бренд кога дома имаат стотици, па и илјадници домашни брендови.  Полесно им е да ги утврдат финансиските показатели за таквите брендови и немаат потреба од претпоставки.  Меѓутоа, кога еднаш ќе се мине таа пречка, се отвора сосема поинаков свет кој е одлично развиен во однос на се, од логистика, продажба на франшиза... Нешто што во Европа не е ниту приближно развиено. 

Практика е на странските пазари да се влезе преку примател на мастер франшиза - ќе се најде еден партнер кој ќе биде задолжен за развивање на мрежата за дадениот пазар. Имате ли таков примател? 

Со оглед на тоа што ние основавме компанија во САД, немаме примател на мастер франшиза, бидејќи Америка е голем пазар за да се потпираме на мастер договор во оваа фаза. Во моментов преговараме со неколку multi-unit оператори кои ја сакаат Surf’n’Fries франшизата. Се уште не сме ја отвориле првата продавница, но таа ќе биде во Сан Диего, откако ќе завршиме со документацијата. Се надевам пред крајот на оваа или најдоцна во првиот квартал од 2021 година.

Какви Ви се натамошните планови? Какви се реалните можности за Surf’n’Fries во САД?

Планираме мрежата да ја развиваме во Калифорнија, Флорида и во останатите американски држави кои се наоѓаат во топлите краишта. Главно сме насочени кон нетрадиционални локации во што знаеме дека сме добри, локации како стадиони, плажи, различни настани и слично.

Кои пазари до сега се покажале како вистински избор? Има ли некој кој посебно се издвојува и зошто?

Секако. Европа многу добро функционира. Германија е на прво место. Интересно е што во Чиле постигнуваме многу добри резултати, што ни е особено драго. Искрено, искуството ни покажува дека успехот многу повеќе зависи од примателот на франшизата отколку од пазарот.

Сега, кога влеговте на пазарот во САД, што планирате за натаму?

Ќе имаме многу работа во САД. Покрај тоа, летово потпишавме договор со  компанијата Rapid Retail од Велика Британија, која, како примател на франшиза, ќе поставува Surf'n'Fries објекти на сите поголеми стадиони во Велика Британија и Франција. Тоа се локации каде многу пати  сме се докажале, па и во тоа гледаме голем потенцијал.